Con motivo do Día Mundial da Reciclaxe, poñemos en valor que continuamos traballando para alcanzar o obxectivo cero residuos na nosa sede central. Unha meta á que está a piques de chegar tendo en conta que valorizamos o 99,5% dos residuos que xeramos na plataforma loxística do Polígono de Piadela, en Betanzos. Case a totalidade reciben unha nova vida útil, aumentando de forma notable a porcentaxe con respecto ao exercicio anterior. Así o confirma de novo e, por terceiro ano consecutivo, o selo “De Residuos A Recursos: Zero A Vertedero”, de Saica Natur Unha acreditación auditada pola compañía internacional de verificación TÜV SÜD.
Mantemos como prioridade o noso compromiso cun modelo de negocio sostible, que busca o equilibrio entre o progreso socioeconómico da contorna e a protección ambiental. Esta estratexia apóiase en catro piares fundamentais: o uso responsable dos recursos, a loxística inversa optimizada, o fomento de compras a provedores de orixe local e unha decidida aposta pola eficiencia enerxética.
Economía circular e uso responsable dos recursos
Integramos a economía circular en toda a nosa operativa baixo a premisa das 3 R: reducir, reutilizar e reciclar. Este ciclo comeza na plataforma loxística, onde o control intelixente do stock axuda a previr o desperdicio alimentario mediante a xestión eficaz dos pedidos. A loxística inversa favorece que as embalaxes sostibles realicen unha viaxe de ida e volta desde a sede central aos supermercados. Ao retornar á plataforma de Betanzos, un equipo composto por preto de 40 profesionais xestiona o cartón, o plástico e a madeira. Anualmente son ao redor de 10.000 toneladas de residuos (cartón, plástico e madeira), que se reintegran á cadea de valor.
Valorización de cartón e plástico
Reciclamos e reutilizamos o 100% do cartón e do papel. Ao redor de 7.100 toneladas de papel e cartón destínanse á fabricación de máis de 37 millóns de caixas reciclables, das que unha parte retorna aos Supermercados Gadis convertidas en caixas de pedidos a domicilio.
Ao reciclar o plástico da plataforma loxística de Betanzos, tamén se lle dá unha nova vida útil. Segundo os datos que manexa Saica Natur, transformáronse preto de 700 toneladas de polietileno de baixa densidade transparente en máis de 3 millóns de m2 de filme estirable, que permite outros usos. Así mesmo, cos residuos de plástico non reciclables, logramos xerar o equivalente ao consumo enerxético anual de 74 fogares.
Datos globais: máis de 8.600 toneladas de cartón e máis de 820 de plástico
A plataforma loxística en Medina del Campo, que dá servizo aos Gadis de Castela e León, tamén réxese polos criterios de sustentabilidade ambiental da sede central. Sumando as cifras de reciclaxe de ambas, valorizamos e puxemos en circulación de novo a máis de 8.600 toneladas de cartón e máis de 820 de plástico.
