Inauguramos o Bosque Gadis, un proxecto de integración social e de conservación da biodiversidade que levamos a cabo en colaboración con Amicos, organización dedicada á inclusión e o apoio de persoas con discapacidade intelectual. Traballadores das Ecobrigadas da entidade plantaron 300 bidueiros para rexenerar de forma natural unha parcela do municipio de Curtis con especies autóctonas de Galicia.
Esta acción inclusiva, que forma parte do noso programa de Responsabilidade Social Corporativa, desenvolveuse en virtude do convenio de colaboración asinado con Amicos, que se plasma en diferentes iniciativas; entre elas, o calendario solidario no que a empresa participa desde fai catro anos, ou o festival Festirititi.
O coordinador dá área de Alianzas con Persoas e Empresas da entidade, Keltoi Cameán, manifestou: “En Amicos buscamos a colaboración de distintos actores para a inclusión real da discapacidade intelectual e o coidado do planeta na sociedade. Esta é unha alianza co Concello de Curtis, que apostou pola cesión dos terreos, e con Gadis, que financia os traballos e a plantación do seu bosque fomentando que catro persoas con discapacidade intelectual poidan manter un emprego. O apoio de Gadis vai máis alá, tanto a través do patrocino do Calendario Solidario como do Festirititi, o gran festival da inclusión que celebramos en Boiro o 3 de decembro polo Día Internacional das Persoas con Discapacidade”.
O noso director de Comunicación, José Luis Fernández Astray, mostrou a súa satisfacción con esta iniciativa, que simboliza a filosofía empresarial de actuar con responsabilidade no presente, desde unha perspectiva económica, social e de respecto á contorna natural, como legado para as futuras xeracións. Ademais, puxo en valor o propósito de apoiar a integración sociolaboral das persoas con diversas capacidades: “Queremos mellorar as súas condicións de vida e facilitar a súa integración no mercado laboral”.
As Ecobrigadas tamén levaron a cabo os labores previos de adecuación ao terreo para poder realizar a reforestación con bidueiros, especie autóctona elixida por ser a máis indicada para a parcela e porque favorece a súa integración na contorna. Estas brigadas son equipos multidisciplinares cualificados e especializados en sectores como o forestal, xardinería, obras ou bedelería; co obxectivo de xerar oportunidades laborais para as persoas con discapacidade intelectual ou en risco de exclusión social.
Na visita ao novo Bosque Gadis tamén participaron a nosa coordinadora de RSC, Lucía Santos, o alcalde de Curtis, Javier Francisco Caínzos e o concelleiro de Medio Ambiente, Xuventude e Infraestruturas de Curtis, Iván Maques, quen indicou que “para nós é un pracer que Amicos colabore tanto co Concello de Curtis como con empresas privadas como Gadis, e seguirán tendo o noso apoio para proxectos como este, nos que a reforestación forestal ocupa un papel central, algo que é moi necesario neste momento”.
Gadis, comprometida coa nosa contorna
O compromiso coa contorna e co benestar da sociedade é un dos propósitos da compañía, que levamos a cabo a través da nosa propia actividade empresarial e co desenvolvemento dun completo plan de Responsabilidade Social Corporativa, aliñado cos Obxectivos de Desenvolvemento Sostible. Desde hai case dúas décadas somos asinantes do Pacto Mundial de Nacións Unidas.
