Festivais de música e audiovisuais, festas e celebracións populares e outros eventos, como feiras medievais, integran o noso programa cultural, que se intensifica durante a época estival e inclúe máis de 150 actividades e eventos ao longo de todo o ano, tanto en Galicia como en Castela e León.
Con este amplo abanico de propostas, pretendemos achegar a cultura ao maior número de persoas posible. Un respaldo que parte da convicción de que a promoción cultural contribúe ao desenvolvemento socioeconómico local e é fundamental para manter vivas as tradicións.
Eventos culturais para todas as idades
Co obxectivo de chegar a públicos de todas as idades, desde Gadis colaboramos cos eventos culturais e festivos máis relevantes da comunidade galega e de Castela e León, nos que anualmente se reúnen miles de persoas. En próximas datas estivais: a Festa do Albariño de Cambados, entre o 30 de xullo e o 3 de agosto; a Festa da Carballeira de Zas, 8 e 9 de agosto; Río Verbena Fest, 22 e 23 de agosto; o Festival de la Luz, que terá lugar do 29 ao 31 de agosto, as festas de Valladolid, do 5 ao 14 de setembro; o Recorda Fest, 5 e 6 de setembro; ou o Festival Revenidas (Vilagarcía), entre o 11 e o 14 de setembro.
Algunhas das citas que apoiamos acaban de celebrarse, como o Atlantic Fest (Vilagarcía), a Festa da Merluza de Celeiro ou o Planeta Sound, esta mesma fin de semana. E tamén recentemente O Son do Camiño, o Portamérica, o Festival de Ortigueira, a Feira Franca Medieval de Betanzos, o Vintoro de Zamora, a Festa do Polbo de Mugardos ou o Ouren Sound Fest.
Ademais da colaboración cos organizadores de eventos, brindamos aos nosos clientes a posibilidade de vivir experiencias a través de sorteos, como o que recentemente lanzamos nas redes sociais e que consiste nun abono dobre para o 17º Festival Ribeira Sacra, ademais dunha experiencia en catamarán e unha noite no Parador de Monforte de Lemos para dúas persoas.
O noso compromiso coa cultura esténdese, así mesmo, ao ámbito cinematográfico, apoiando iniciativas de referencia como o Festival de Cans (O Porriño), o Play-Doc (Tui), a Semana Internacional del Cine de Betanzos, o FIC Bueu, o Ourense Film Festival, o Festival de Cine de Medina del Campo ou a Seminci de Valladolid.
Gadis coas festas populares
Con raíces 100% galegas, o compromiso de Gadis coas festas populares mantense desde as nosas orixes porque contribúen a conservar as tradicións e fortalecen o sentido de identidade e cultura na comunidade.
Numerosas celebracións tradicionais e gastronómicas teñen o noso respaldo, como a Feira do Cocido de Lalín, o Asalto ao Castelo (Vimianzo), a Festa do Viño Tinto do Salnés de Barrantes (Ribadumia) e a Feira do Viño de Amandi (Sober), entre outras.
